Месяца ноемврия в 1-й день Святых священномучеников



Скачать 128,4 Kb.
Дата24.02.2016
Размер128,4 Kb.
#12260
Месяца ноемврия в 1-й день

Святых священномучеников

Александра Смирнова и Феодора Ремизова
На велицей вечерни

На Господи, воззвах: глас 5.

Подобен: Радуйся, Живоносный Кресте:

Радуйтеся, священномученицы славнии!/ Вы бо, во одежду светлу добродетелей одеявшеся,/ Христу усердно послужили есте,/ таже, яко злато в горниле, огнем мучения очистившеся,/ на брак Агнчий Владыкою призвани бысте,/ и, в Небесных обителех водворившеся,/ Божественныя трапезы приобщаетеся./ Темже, со всеми святыми Богу предстояще,/ молитеся о спасении душ наших.

Радуйся, священномучениче Александре!/ Ты, жертву безкровную благоговейне совершая,/ паству твою добре упасл еси,/ егда же попусти Господь братоубийство и веры Христовы поругание,/ себе самаго в жертву живую принесл еси/ и, в багряныя ризы кровию своею облачився,/ истинный священник Бога Вышняго явился еси./ Ныне же, со всеми святыми Богу предстоя,/ молися о спасении душ наших.

Радуйся, священномучениче Феодоре!/ Воистину дар Божий явился еси,/ укрепляя нас Христа исповедати./ Ты бо, верен Богу и Церкви пребыв,/ душевная и телесная страдания претерпел еси/ и, смерть от безбожных за Господа прием,/ тесными враты в жизнь вечную вшел еси./ Ныне же, со всеми святыми Богу предстоя,/ молися о спасении душ наших.

Радуйтеся, священномученицы славнии!/ Вы бо, благодатию Духа Святаго напоени,/ плодоносное прозябение веры Христовы явилися есте,/ и, кровию своею землю оросивше,/ миродержителя тьмы века сего посрамили есте/ и Церковь Русскую украсили есте,/ верныя во исповедании Православия укрепляюще./ Ныне же, со всеми святыми Богу предстояще,/ молитеся о спасении душ наших.

Слава, глас 6:

Днесь благодать Святаго Духа нас cобра/ в прославление святых пастырей Александра и Феодора,/ тии бо Престолу Божию предстоят,/ славяще Отца и Сына и Святаго Духа,/ и молятся о спасении душ наших.

И ныне, Богородичен: Кто Тебе не ублажит:

Вход. Прокимен дня. И чтения новомучеником:

Деян.(4,6-31), 2 Тим. (4,1-8), Евр. (11,33-40)

На литии стихира новомучеником, глас 6.

Подобен: Отчаянная:



Творение святителя Афанасия Ковровскаго.

Отчаяни есмы/ жития ради/ и не имамы/ нрава добродетельна,/ но, яко миро, приносим Ти, Господи,/ молитвы святых сродников наших./ Не отвержи Русь, издревле Святую,/ ныне же грехов наших ради люте страждующую./ Не презри слезы верных сынов,/ колен своих пред Ваалом не преклонявших,/ и ихже не поразил еси, согрешающих./ Приими нас, кающихся, Боже,/ святых Твоих мольбами.

На стиховне стихиры, глас 2:

Древним мучеником подобящеся,/ святии Александре и Феодоре,/ во страданиих тяжких непоколебими пребысте/ и мучителем своим вопиясте:/ страха вашего не убоимся, ниже смутимся,/ яко с нами Бог.

Стих: Проидохом сквозе огнь и воду,/ и извел еси ны в покой.

Небрегше о сосудех телес ваших,/ святии Александре и Феодоре,/ мученически течение жития скончасте./ Темже, празднующе память вашу,/ песненными похвалами венчаем вас,/ ходатаев наших пред Христом Богом,/ Егоже молите спасти и просветити души наша.

Стих: Блажени живущии в дому Твоем,/ в веки веков восхвалят Тя.

Егда приидет Господь во славе Своей/ и святии Ангели с Ним,/ судити миру всему,/ тогда и вы, мученицы достохвальнии,/ имущии дерзновение велие,/ помяните нас, любовию память вашу празднующих.

Слава, глас 6:

Огнем страдания всесожжегшеся,/ священномученицы Александре и Феодоре,/ яко хлеб сладкий Святей Троице принесостеся,/ Юже прилежно молите/ спасти и просветити души наша.

И ныне, Богородичен:

Егда приидет времен исполнение,/ труба же Архангелова вострубит,/ престоли судищныя поставятся и река огненная возшумит,/ мертвии возстанут и живии восхищени будут,/ и явится знамение Сына Человеческаго на Небесех,/ вси земнороднии восплачутся,/ и вся силы Небесныя поколеблются,/ тогда Дева Богородица,/ грешных Спасение и ненадежных Надежда,/ одесную Судии предстоящи явится,/ пречистеи Свои руце к Сыну простирающи,/ и слезами ланиты Своя милостивно орошающи,/ и вечнаго мучения избавляющи,/ имя Ея препетое призывающих./ Темже убо, братие,/ ныне потщимся и к Богородице прибегати не обленимся,/ да и нас заступит в оный страшный час,/ все упование на Ню возлагающих.

По Ныне отпущаеши: тропарь священномучеником дважды и Богородице Дево: единожды.

Тропарь, глас 1:

Безкровную Жертву Богу приносяще,/ предстояли есте престолу земнаго храма./ Излиявше же кровь свою за Христа,/ днесь предстоите Небесному Престолу Царя Славы,/ святии священномученицы Александре и Феодоре,/ молитеся непрестанно спастися душам нашим.
На утрени

По 1-м стихословии седален, глас 2:

О, святии Александре и Феодоре, священницы Бога Вседержителя,/ приемшии от Него власть вязати и решити грехи людем,/ разрешите убо и наших зол множество/ и направите стопы наша на путь мира.

Слава, и ныне, Богородичен:

Яко юродивыя девы, не имамы светильника покаяния,/ не обретохом елея милости, слез и воздыханий сердечных,/ темже стоим вне Чертога Небеснаго и вопием:/ Мати Божия, отверзи нам двери милости Твоея.

По 2-м стихословии седален, глас 1:

От беззаконных пострадавше,/ венцы нетленными от Господа венчалися есте, священномученицы славнии,/ и нас утвердите подвигом добрым подвизатися/ и течение жизни достойно совершити,/ вас бо теплыя ходатаи ко Спасу стяжахом.

Слава, и ныне, Богородичен:

О, Пресвятая Дево Богородице,/ буди нам Заступница и Покров от враг видимых и невидимых/ и теплая Предстательница пред Сыном Твоим,/ вкупе со священномученики Александром и Феодором/ молящи Его о спасении душ наших.

Величание:

Величаем вас,/ святии священномученицы Александре и Феодоре,/ и чтим честная страдания ваша,/ яже за Христа/ претерпели есте.

Псалом избранный: Бог нам Прибежище и Сила:

По полиелеи седален, глас 4:

Днесь двоицу святых страдальцев прославим,/ крепкаго духом Александра и мужественнаго Феодора,/ иже, союзом братския любве связуемии, пострадати за Христа сподобишася./ Ныне же Престолу Божию предстоят/ и молятся о спасении душ наших.

Слава, и ныне, Богородичен:

Богородице, Упование христианом,/ буди нам Помощница и Предстательница пред Сыном Твоим/ во вся дни живота нашего.

Прокимен, глас 4: Проидохом сквозе огнь и воду,/ и извел еси ны в покой. Стих: Разжегл ны еси, якоже разжизается сребро. Евангелие от Матфея, зачало 36.

По 50-м псалме стихира, глас 6:

Како возможем прославити вас по достоянию/ или киими песньми воспоим подвиги ваша,/ священномученицы Александре и Феодоре?/ Вы бо от Самаго Христа Бога/ победными венцы украсилися есте./ Но приимите смиренныя мольбы наша/ и исцелите болезни душевныя и телесныя,/ память вашу светло празднующих.

Канон, глас 6.

Песнь 1

Ирмос: Яко по суху, пешешествовав Израиль/ по бездне стопами,/ гонителя фараона/ видя потопляема,/ Богу победную песнь поим, вопияше.



Како дерзнем, недостойнии, воспети священную двоицу мучеников,/ пред лицем безбожных Имя Христово исповедавших/ и кровь свою за веру Православную пролиявших?/ Но даждь нам, Господи, разум прославити сих,/ Тебе в житии своем прославльших.

О, пастырие ревностнии и мученицы доблии,/ во страдании своем Троицу Святую исповедавшии,/ вы храмы Духа Святаго явистеся,/ на Истиннем Камени, Христе, утвержденнии.

Друзи Христовы суще, священномученицы Александре и Феодоре,/ заповедь Господню о любви совершеннейшей исполнили есте,/ души своя за Него положивше.

Богородичен: Кия похвалы принесем Тебе, Владычице Пречистая,/ или кую песнь воспоим Тебе, рождшей Бога плотию,/ токмо юже Гавриил Архангел возвести:/ радуйся, Благодатная, Господь с Тобою.

Песнь 3

Ирмос: Несть свят,/ якоже Ты, Господи, Боже мой,/ вознесый рог верных Твоих, Блаже,/ и утвердивый нас на камени / исповедания Твоего.



Заповедем Господним поучающеся,/ соблазны мира сего отринули есте/ и, крест свой на рамо вземше,/ Христу последовали есте./ Темже, от Него укрепляеми,/ Царства Небеснаго достигли есте.

Юдоль земную благочестно прошедше/ и кровию своею веру запечатлевше,/ ныне миру истину Христова Воскресения свидетельствуете/ и нам, блаженнии, путь спасения показуете.

Доблии служителие Господа Иисуса Христа явистеся,/ священномученицы преславнии,/ питаемии словесы веры и добрым учением,/ емуже и последовали есте./ Темже и образ бысте верным/ словом, житием, любовию, духом, верою и чистотою.

Богородичен: Тя Предстательницу, Пречистая Дево, молим:/ преложи нашу печаль на радость/ и скорби належащия избави, Заступнице наша.

По 3-й песни седален, глас 5:

Безкровную Жертву усердно Богу приносяще и в добродетелех возрастающе,/ украшение пастырей явистеся, святии священномученицы Александре и Феодоре./ Егда же прииде время испытания,/ злокозненнаго врага низложисте и венцев мученических сподобистеся./ Темже молите, да подаст Господь пастырем Церкви ревность и попечение о чадех своих.

Слава, и ныне, Богородичен:

Предстательнице теплая и Заступнице усердная,/ в годину безбожия от конечныя погибели землю Русскую всемощным ходатайством к Сыну Твоему избавльшая./ И ныне не остави нас молитвами Твоими, Владычице Богородице.

Песнь 4

Ирмос: Христос моя Сила,/ Бог и Господь,/ честная Церковь/ боголепно поет, взывающи:/ от смысла чиста о Господе празднующи.



Пастырие Божии и мученицы славнии,/ вы Агнцу и Пастырю Христу последовасте/ и, от рук безбожных заклавшеся,/ вообразисте Его заколение.

Пастырие Божии, Александре и Феодоре,/ вы, за убийц своих молящеся,/ Пастыреначальнику Христу подражали есте, взывающе:/ Боже, остави им, не ведают бо, что творят.

Святыя мощи ваша, достохвальнии,/ вместилища благодати Духа Святаго явишася./ Ихже обретение светло празднующе,/ с преподобным аввою Сергием вас ныне ублажаем.

Богородичен: О, Владычице Богородице,/ буди нам Щит и Заступление в скорбех, находящих на ны,/ разве бо Тебе инаго предстательства не вемы. Песнь 5

Ирмос: Божиим светом Твоим, Блаже,/ утреннюющих Ти душы любовию озари, молюся,/ Тя ведети, Слове Божий,/ истиннаго Бога,/ от мрака греховнаго взывающа.

Яко свеща, Богом возжженная, явился еси, святый мучениче Александре,/ темже и души наша светом Христовым просвети/ и от мрака греховнаго избави.

Воли Божией себе вручивше, священномученицы прехвальнии,/ на подвиг страдания за Христа мужественно устремистеся,/ темже и обетованное Царство от Него получисте.

Празднество двоице святей Косме и Дамиану совершивше,/ сугубую благодать к подвигу мученичества восприяли есте/ и крилома Божественныя любве к Небесем возлетели есте, достохвальнии.

Богородичен: Стена необоримая и Покров всемощный/ новомучеником Церкве Русския явилася еси, Пресвятая Дево,/ темже Тя величаем.

Песнь 6


Ирмос: Житейское море,/ воздвизаемое зря,/ напастей бурею,/ к тихому пристанищу Твоему притек, вопию Ти:/ возведи от тли живот мой,/ Многомилостиве.

Удивишася мучителие пачеестественному терпению вашему, пастырие Христови,/ тии бо страхом смерти мняху вас низложити,/ вы же, благодатию Божиею утверждаеми,/ врага посрамили есте.

Вас, святии мученицы, ничтоже возможе разлучити от любве Божия/ и, якоже писано есть, вменистеся, яко овцы заколения,/ и победители явистеся силою Возлюбившаго вас.

Спасову победоносному Воскресению приобщившеся,/ мучителей победно низложили есте, святии мученицы,/ и, демонов немощныя дерзости сокрушивше,/ свидетелие Истины явилися есте.

Богородичен: В скорбех Помощницу, в болезнех Целительницу,/ от уз Свободительницу обретохом Тя, Владычице Богородице,/ темже молим Тя:/ не удали от нас милости Твоя.

Кондак, глас 2:

Пастырие Христови, Александре и Феодоре,/ священномученик чудная двоице,/ мужественне веру Православную пред мучители исповедовавшии/ и кровию своею землю Русскую обагрившии,/ страдания ваша днесь благочестно восхваляем/ и мощи ваша умильно лобызаем,/ молите непрестанно о всех нас.

Икос:


Руце своя к Богу молебне простирали есте,/ Жертву безкровную Тому приносяще, достоблаженнии,/ темже и от десницы Вседержителевы венцы мученическия и нетление прияли есте./ Мы же, взирающе на подвиги ваша, верно вопием:

Радуйтеся, Царства Небеснаго наследницы;

радуйтеся, исповедницы Христа Бога нашего.

Радуйтеся, яко за Него пострадати изволисте;

радуйтеся, яко в дар мощи своя нам остависте.

Радуйтеся, земли Московския освящение;

радуйтеся, граду нашему утверждение.

Радуйтеся, прибегающим к вам скории помощницы;

радуйтеся, душевных недугов целителие.

Радуйтеся, Александре и Феодоре, теплии о нас к Богу молитвенницы.


Песнь 7


Ирмос: Росодательну убо пещь/ содела Ангел/ преподобным отроком,/ халдеи же опаляющее/ веление Божие/ мучителя увеща вопити:/ благословен еси, Боже, отец наших.

Господь, древле росу с Небесе трием отроком пославый,/ и вам во огни страданий благодать Свою ороси,/ вы же, любовию к Нему исполнени, пети всех научисте:/ благословен еси, Боже, отец наших.

Яко отроцы посреде огня неопально стояху,/ тако и вы, святии мученицы Александре и Феодоре,/ посреде огненнаго испытания веры неопалими пребысте, Христу вопиюще:/ благословен еси, Боже, отец наших.

Яко злато в горниле очищено явистеся, святии мученицы Александре и Феодоре,/ и во страданиих крепчайше адаманта показастеся, Христу вопиюще:/ благословен еси, Боже отец наших.

Богородичен: На Тя, Богородице, упование наше возлагаем,/ Ты бо еси Покров и Стена Нерушимая всем верным./ Темже вопием Ти:/ радуйся, Благодатная, Господь с Тобою.

Песнь 8


Ирмос: Из пламене преподобным росу источил еси/ и праведнаго жертву водою попалил еси,/ вся бо твориши, Христе, токмо еже хотети./ Тя превозносим во вся веки.

Чина иерейскаго не отреклся еси, мучениче Александре,/ ниже одежд священнических отложил еси/ и, верен Пастыреначальнику пребыв,/ в ризу света облеклся еси,/ превознося Христа во веки.

Беззакония и убийства мучителей обличая, блаженне Феодоре,/ страха их не убоялся еси/ и, силою Божиею укрепляемь,/ даже до смерти вся претерпел еси,/ превознося Христа во веки.

Православныя веры исповедницы/ и учения евангельскаго провозвестницы явилися есте, мученицы Александре и Феодоре./ Темже и нас наставите шествовати путем заповедей Господних,/ да купно с вами превозносим Христа во веки.

Богородичен: Разори советы вся на ны вооруженныя, Мати Бога Вышняго,/ и радости исполни уповающыя на Тя,/ да усердно вси Твое проповедуем заступление.

Песнь 9


Ирмос: Бога/ человеком невозможно видети,/ на Негоже не смеют чини ангельстии взирати,/ Тобою же, Всечистая, явися человеком/ Слово воплощенно,/ Егоже величающе,/ с Небесными вои Тя ублажаем.

Смертию своею веру в воскресение исповедавше/ и упование непоколебимое на Господа возложивше,/ любовь ко Христу страданьми своими явили есте, святии,/ и от Него вечную жизнь во Царствии Небеснем восприяли есте.

Терпением многим муки претерпевше, святии мученицы Александре и Феодоре,/ Христа смертию своею прослависте./ Того прилежно молите, да спасет души наша.

О, бездна благости Божия!/ Дарова бо Господь возлюбленным Своим веры ради пострадати,/ и вас, священномученицы Александре и Феодоре,/ яко плод красный Своего спасительнаго сеяния яви.

Богородичен: Богородице Дево,/ моли Сына Твоего и Бога нашего со всеми святыми Церкве Русския,/ да обратятся люди заблуждшия к вере Православней и спасение улучат.

Светилен:

Светодавец Христос Бог наш, исходы утра и вечера украсивый,/ Света Невечерняго вас, священномученицы Александре и Феодоре, сподоби./ Темже, во светлостех святых пребывающе,/ и нас светом незаходимым просветите,/ да, в радости ликующе, прославим Свет нам Показавшаго.

Слава, и ныне, Богородичен:

Под Твою милость прибегаем, Богородице Дево,/ молитв наших не презри в скорбех,/ но от бед избави нас Едина, Чистая и Благословенная.

На хвалитех стихиры, глас 8.

Подобен: О, преславнаго чудесе:

Воспоим, вернии, мучеников двоицу святую,/ тии бо, веру Христову,/ яко твердое основание жития, положивше,/ единомудренны и единодушны во страданиих пребыша/ и, смирением своим прелукавого змия победивше,/ яко жертва благоуханная Богу принесошася./ Темже радуются ныне со Ангельскими чинми/ и сликовствуют с новомученики Церкве Русския,/ прославляюще Христа Бога нашего.

Приидите, вернии,/ восхвалим ныне заступники наша,/ священномученики Александра и Феодора,/ тии бо, муки мужественне от беззаконник претерпевше,/ верность Христу даже до смерти сохраниша/ и, кровьми своими землю Русскую обагривше,/ Небеснаго блаженства достигоша,/ егоже и нам, святии, испросите,/ вас бо теплыя ходатаи ко Спасу стяжахом.

Преславнии священномученицы Александре и Феодоре,/ вы, яко истиннии пастырие Церкве Христовы,/ жертву безкровную первее благоговейне совершающе,/ послежде, яко всеплодие благоприятное,/ самих себе в жертву живую принесли есте,/ молящеся, да простится грех богоборчества народу нашему./ И ныне, святии, Престолу Божию во славе предстояще,/ Христа молите/ даровати нам мир и велию милость.

Слава, глас и подобен тойже.

О, преславнаго чудесе!/ Яко крини посреде терния,/ в Земли Русстей процвели есте,/ священномученицы Александре и Феодоре,/ и, кровьми страданий за Христа/ ризы своя обагрили есте./ И ныне, в селениих райских пребывающе,/ молите Святую Троицу / спастися душам нашим.

И ныне, глас и подобен тойже:

О, преславнаго чудесе!/ Небесе и земли Царица/ от святых сродников наших умоляемая,/ до ныне землю Русскую покрывает/ и лика Своего изображении милостивно обогащает./ О, Владычице Державная!/ Не престани и на будущее время/ во утверждение на Руси Православия/ милости и чудеса изливати до века. Аминь.

На Литургии

Блаженна от канона песни 3-я и 6-я. Прокимен, глас 7: Честна пред Господем/ смерть преподобных Его. Стих: Что воздам Господеви о всех, яже воздаде ми? Апостол к Римляном, зачало 99 (8, 28-39). Аллилуиа, глас 2: Священницы Твои облекутся в правду/ и преподобнии Твои возрадуются. Стих: Бог нам Прибежище и Сила, Помощник в скорбех, обретших ны зело. Евангелие от Луки, зачало 106, (21, 12-19).Конец: В терпении вашем стяжите души ваша. Причастен: Радуйтеся, праведнии о Господе, правым подобает похвала.

Молитва

О, святии священномученицы Александре и Феодоре! К вам, яко к неоскудевающему источнику благодати Божией, мы, недостойнии, прибегаем. Вы бо тоя сподобистеся, адаманты веры суще. Еще же и страшныя раны и хуления злобная нечестивых мучителей претерпевше, уверение о венце мученичестем от Господа приясте и терпением своим, древним мучеником подражающе, мучителей удивисте.



Яко пастырие Божии суще, ревностно службу в земных храмех совершавше и молитвою своею народ Божий укреплявше, будите и за нас молитвенницы, предстояще ныне пред Престолом Вседержителя.

Вы, понесше тяготу и зной дневный, не токмо словом, но и делом бысте свидетелие Правды Божией, утвердите и нас во истине Христовой, не понесших ни тяготы поношений, ни зноя гонений, но да будем, яко наемницы единонадесятаго часа, чающии мзду прияти от Христа во Царствии Небеснем.



Испросите у Бога молитвами вашими, святии страдальцы Христови, веры Православныя укрепление, помыслом нашим освящение, в добродетелех преспеяние; да дарует Он дар благопотребен коемуждо просящему предстательства вашего, да сподобит нас и в час кончины нашея оную твердость веры явити, кую же и вам дарова, да со всеми святыми сподобимся в Царствии Небеснем непостыдно воспевати Его Пресвятое Имя Отца, и Сына, и Святаго Духа во веки веков. Аминь.



Каталог: upload -> information system 16
upload -> Одобрено на заседании каф. Философии и гуманитарных дисциплин Пушкина Н. М
upload -> Сборник тезисов докладов и методических материалов круглого стола психологов (11-12 ноября 2015 года) Екатеринбург 2015
upload -> Название кафедры
upload -> Мультикультурное образование в сша, канаде и австралии
upload -> Департамент образования и молодежной политики
information system 16 -> Мотивации категорийного менеджера
information system 16 -> Фактор качества учебной деятельности, формирования самостоятельной и познавательной деятельности учащихся
information system 16 -> Шелудченко А. В
information system 16 -> Межпредметные связи, выражающие интеграцию учебного знания предусматривают совмещение различных элементов учебных программ

Скачать 128,4 Kb.

Поделитесь с Вашими друзьями:




База данных защищена авторским правом ©psihdocs.ru 2022
обратиться к администрации

    Главная страница